“Retornamos!, á terceira foi a vencida”, din os Náufragos do Paradiso para lembrar que pasados uns duros anos pandémicos recuperan a organización do ‘Festival do Paradiso’, un evento musical e cultural alternativo que chega este ano á súa novena edición.
Este ano presenta un cartel con 6 grupos musicais de diferentes estilos, apostando pola heteroxeneidade como marca distintiva que os caracteriza.
Apostando polo talento musical local o festival contará coa percusión de Baturruka Monforte, o folk de Cadela Asasina, a música soul dos CoolFlanders e o eclecticismo de Bela Chaos. Os forasteiros do cartel serán as recoñecidas bandas roqueiras Moon Cresta e Recambios Tucho.
OUTRAS ACTIVIDADES PARALELAS
O Festival do Paradiso deste ano contará con sesión vermú, un xantar popular, obradoiros e un recital de poesía. Esta última actividade contará cun micro aberto e no que respecta ao obradoiro farase unha formación sobre relacións positivas que correrá a cargo da entidade feminista FEMforte. Este mesmo colectivo poñerá un punto lila mentres dure o festival.
E todo isto de balde, “para que os cartos nunca sexan barreira para pasalo ben”, din dende a organización.
