Desde o vindeiro luns, 16 de xaneiro, non será posible utilizar os aparcamentos laterais da rúa Curros Enríquez, debido ós traballos de instalación da nova tubaxe na rede xeral abastecemento de Monforte. A actuación lévase a cabo nunha rúa de titularidade municipal que non require permiso doutras administracións, tan só do concello monfortino, o que permite axilizar e avanzar nos traballos de instalación de dita tubaxe.

O Alcalde, José Tomé Roca, salienta que “esta actuación, que sigue o seu curso tras ser iniciada no pasado mes de novembro, supón un antes e un despois na mellora da rede xeral de abastecemento de auga de Monforte”, e recorda que “con esta obra resolveremos un problema moi importante, xa que vai garantir que Monforte non se quede sen auga potable”.

Obras de instalación da nova tubaxe na rede xeral abastecemento

Estes traballos iniciáronse a finais do pasado mes de novembro de 2022, e consisten na dotación dunha nova tubería xeral de fundición na rede de abastecemento de auga, entre os depósitos do Cornado e os depósitos de San Vicente, cun investimento de 1,7 millóns de euros.

O inicio das obras tivo lugar na zona do Campo de fútbol de Ribasaltas e avanza en dirección á cidade, desenvolvéndose por tramos. O proxecto que acomete Aqualia denomínase “Desdobramento da rede xeral da distribución de Monforte” e consiste na construcción dunha nova tubería xeral na rede de abastecemento, de fundición, entre os depósitos do Cornado e os depósitos de San Vicente.

“Deste xeito, teremos desdoblada a Rede Xeral de Abastecemento, dado que teríamos 2 tubaxes, a actual e a nova tubaxe, e así evitamos as reiteradas roturas na actual tubaxe de fibrocemento, xa que a nova de fundición é moi difícil que teña unha avaría deste tipo”, explicou no seu momento o Alcalde.