A finalidade desta iniciativa é promover hábitos cívicos e responsables entre os propietarios das mascotas, fundamentalmente para evitar que os transeúntes atopen excrementos nas beirarrúas. A primeira fase da campaña será explicativa e de control, “máis adiante poderanse impoñer sancións aos infractores de acordo co establecido na Ordenanza Municipal de Medio Ambiente”, sinala o concelleiro de medio ambiente, Pedro López.

Ao respecto, lembra que esta norma municipal establece que as persoas que paseen cans polas vías e espazos públicos, ademais de levalos atados e, dependendo da perigosidade potencial do animal, con bozo, deberán levar obrigatoriamente unhas bolsas para a recollida e limpeza dos excrementos. A ordenanza tamén sinala que no caso de que as dexeccións queden depositadas nas beirarrúas ou noutras zonas destinadas ao tránsito peonil, a persoa que conduza o animal deberá proceder á súa limpeza inmediata e, debidamente empaquetada, depositala en papeleiras ou contedores de lixo.

En canto ás sancións que determina a citada ordenanza, o feito de non levar bolsas para a recollida dos excrementos dos cans está considerado unha infracción leve, que podería sancionarse cunha multa de 100 euros; o feito de non proceder á limpeza dos excrementos dos cans está tipificado como unha sanción grave, que se sancionará cunha multa de 200 euros; e a reincidencia en dúas faltas graves será considerada unha falta moi grave, pola que se poderán impoñer sancións de 300 euros.