A Plataforma en Defensa da Sanidade Pública de Monforte segue coas súas actividades para
concienciar a cidadanía da importancia de defender o sistema público de saúde. Despois da participación no pleno para solicitar a colaboración de todas as forzas políticas do consistorio local, as portavoces visitaron Onda Cero Monforte e Radio Principal Cadena Ser Monforte para incidir na situación que atravesa a atención especializada e sobre todo a atención primaria na zona sur da provincia.
Pladesapu insta á cidadanía a acudir á concentración convocada para este luns 6 de febreiro, ás 20h na praza de España de Monforte, para protestar contra o desmantelamento da sanidade no distrito, “que empeorou de xeito exponencial tras a perda da área sanitaria e centralizar todo en Lugo.”
