A mediados do pasado ano abríase expediente sobre o tema e o concello do Saviñao comprometíase a solicitar un informe técnico para outra posible localización. Segundo a asociación veciñal ao non haber novidades regresa coa demanda ao concello, “a resposta foi que non podían solicitar a retirada das devanditas antenas porque habería que pagar unha indemnización á compañía por incumprimento de contrato, e que o concello sí recibía 25.000 pesetas por adxudicar ese espazo para a colocación desas antenas.”

A asociación asegura que “non é comprensible esta resposta cando durante anos fartáronse de anunciar na prensa que retirarían ditas antenas.” O concello sinala que non hai evidencias de danos e/ou prexuízo ás persoas, pero a asociación lembra, “a realidade é que nun perímetro de 400 metros ao redor de ditas antenas, con aproximadamente 30 vivendas habitadas, houbo un total de 12 casos de cancro confirmados durante os anos que levan ditas antenas. Ese número supera a prevalencia estimada dos casos de cancro en España segundo a SEOM.”

A esta demanda súmase a Federación de Asociacións da Ribeira Sacra, que presentou un escrito ante o concello, que aínda non tivo respota. “O único que nos queda aos veciños afectados, e recordo, que dita antena esta á beira dun colexio é aproveitar que estamos en ano electoral e chamar á prensa para que alguén nos faga caso. É deprimente, que as institucións que deben velar polos intereses dos cidadáns non fagan nada ante estas situacións,” demanda a veciñanza á Valedora do Pobo.