O santuario de Guadalupe é unha capela construída no século XVIII no Saviñao e considerada un exemplo singular dos santuarios de culto marianos que se construíron durante o período barroco na Ribeira Sacra. “Este é un ben patrimonial de moito valor, polo que supón a nivel cultural e artístico, pero tamén polo que ofrece ao entorno da Ribeira Sacra”, destacou García Porto, quen defendeu ademais que, polos danos provocados pola falta de mantemento, a súa rehabilitación é “imprescindible para poder aproveitar todo o seu potencial como atractivo turístico no concello e na comarca”.
Subliñou tamén o compromiso da institución provincial con este templo, situado no entorno do val do Miño, e que conta tamén cun importante valor social polo que supón para os veciños e veciñas do Saviñao. A Deputación de Lugo investiu máis de 2,5M€ desde o ano 2019 neste concello, a meirande parte estivo destinada a mellorar as infraestruturas, o fomento do emprego e reforzar as políticas sociais.
Situado na parroquia de San Vitorio de Ribas de Miño, o santuario de Guadalupe ten unha construción na que predomina o granito, ten unha planta rectangular de cruz latina e sobre a súa fronte érguense dous campanarios. No seu interior hai un retablo maior e dous retablos laterais da época barroca que xa perderon parte da súa policromía.
