Tralo éxito desta proba, con 5.200 usuarios entre o 1 e o 9 de abril, o Consorcio de Turismo da Ribeira Sacra decide retomar o servizo para outra das pontes máis concorridas do calendario. Así este servizo gratuíto estivo en funcionamento entre o sábado e o luns (incluídos), en horario de de 11:00 a 14:30 e de 15:45 a 19:30 horas. A reserva previa de prazas non era precisa, xa que as frecuencias da lanzadeira foron continuas nesa franxa horaria.
“Confirmouse novamente a necesidade dun servizo coma este para protexer e controlar os aforos nos recursos máis vulnerables; un total de 2.272 persoas fixeron uso do servizo durante os 3 días da ponte. O domingo e o luns foron as xornadas con máis afluencia de visitantes, rexistrándose cifras iguais ás dos días centrais da Semana Santa,” aseguran desde o Consorcio de Turismo.
O servizo financiouse con cargo á partida de Transportes Sostibles do Plan de Sostibilidade Turística en Ribeira Sacra, na que tamén se recollen iniciativas semellantes como as lanzadeiras á Praia da Cova ou á do mosteiro de Santa Cristina, que leva 2 anos en funcionamento.
O xeodestino Ribeira Sacra supera as expectativas de ocupación nesta ponte de maio
A ocupación dos aloxamentos sitúase nun 85%:
- Hoteis 4 e 3*: 97,5% (+7,5% sobre previsións)
- Turismo Rural: 84% (+7% sobre previsións)
- Vivendas Turísticas e de Uso Turístico: 85% (+6% sobre previsións)
- Outros aloxamentos: 74 % (+8% sobre previsións)
Cos datos recollidos supéranse nun 7% as previsións que os aloxamentos tiñan a mediados da semana pasada. “Estamos ante as cifras de ocupación para esta ponte máis altas dende que temos rexistros; son un 21% superiores ás do ano pasado”, afirman desde o Consorcio.
