Ao referirse á falta de material no Hospital Comarcal de Monforte, tiñan denunciado a perda de dous aparellos para realizar electrocardiogramas, e agora suman a perda do monitor do servizo de endoscopias, “Neste servizo adminístranse sedacións, que requiren a monitorización de certas constantes vitais dos pacientes, e agora mesmo estase a facer cun tensiómetro e pulsioxímetro como o que se pode atopar en calquera farmacia. Mención especial merece tamén o electrocardiógrafo do servizo de reanimación, un modelo tan antigo que a día de hoxe o papel que precisa para a impresión do electrocardiograma está descatalogado”, sinalan.

En canto ás reclamacións polo mal funcionamento do servizo de rehabilitación, aseguran que o Sergas está comezando a contestalas, pero sen compensar aos pacientes por esta situación, “por non tratarse dunha urxencia inmediata e de carácter vital, e utilizar por decisión propia os servizo distintos os da Seguridade Social, non están devolvendo eses cartos”. Insisten, “non é unha decisión propia, máis ben unha decisión motivada pola carencia de medios da Seguridade Social.”

Desde a plataforma seguen animando a xente a presentar as reclamacións e “a non quedar calada ante unha clara vulneración dos seus dereitos como usuarios do sistema público de saúde”. Lembran que todos os mércores de 17 a 18h na Aula 1 da UNED, na casa da cultura de Monforte, persoal da plataforma asesora con calquera dúbida que teñan.