O CEIP A Gándara realizou co alumnado de segundo ciclo de educación infantil e de educación primaria un proxecto sobre linguaxe publicitaria titulado Mercándara, coa finalidade de reflexionar sobre como a publicidade xoga un papel fundamental nos hábitos de consumo e da relación que existe entre o consumo e o xénero. Dentro do proxecto recrearon no centro un supermercado, visitaron un invernadoiro, fixeron unha exposición do percorrido histórico do paso dos empaquetados de papel aos envases de plástico e gravaron un anuncio publicitario dun mesmo produto, pero simulando distintas épocas.
Galicons, que nesta edición contou coa participación de máis de 1200 alumnos e alumnas de toda Galicia, é un programa educativo realizado en colaboración coa Consellería de Cultura, Educación, Formación Profesional e Universidades, incluído dentro do Plan Proxecta, coa finalidade de promover a educación para o consumo responsable nos centros educativos galegos.
Na convocatoria dos premios establécense catro categorías de participación: categoría A: alumnado de segundo ciclo de educación infantil e de educación primaria; categoría B: alumnado de educación secundaria obrigatoria; categoría C: alumnado de bacharelato, de ciclos formativos de grao medio e de grao superior e formación profesional e de educación de persoas adultas; e categoría D: alumnado de educación especial.
O mellor proxecto en cada unha das categorías recibe un premio de 1.500 euros. Ademais, a persoa coordinadora e o profesorado participante nos proxectos premiados recibe da Consellería de Cultura, Educación, Formación Profesional e Universidades unha certificación de premio de innovación educativa cunha equivalencia de 30 horas de formación do profesorado para o profesorado coordinador e 20 horas para o resto do profesorado participante.
