A Gala do Deporte ten como obxectivo premiar e poñer en valor o esforzo e a dedicación de deportistas, clubs, adestradores/as, técnicos/as e árbitros/as do concello de Monforte de Lemos, e por iso o alcalde, José Tomé, considera que “é unha estupenda noticia que tamén se volva á normalidade coa celebración desta Gala tan esperada polo mundo do deporte na cidade do Cabe.”

Foron 32 o número total de candidaturas que se presentaron para participar nalgunha das categorías do concurso, para elixir ás mellores persoas deportistas, adestradoras, árbitras e clubs do ano 2022 o que supón unha das edicións con maior número de candidaturas presentadas.

O evento, que xa vai pola súa oitava edición, terá lugar o xoves 29 de xuño ás 20:30 na Casa da Cultura Poeta Lois Pereiro, e nel daranse a coñecer os gañadores e gañadoras de cada unha das categorías que formaron parte do concurso.

O xurado do concurso, que ten previsto reunirse nos vindeiros días, terá como cometido analizar cada unha das candidaturas das diferentes categorías e elixir aos distintos galardoados.