Segundo Courel Vivo, un problema recorrente no Courel é que o Sergas non cubre as vacacións, ausencias e baixas dos profesionais sanitarios, “Realidade que corroboran os tres grupos municipais, nunha reunión co Conselleiro de Sanidade, en Santiago no 2017”.
Lembran casos de urxencia nos que no centro de saúde non había médico pola mañá, “a solución do Sergas é non dar citas eses días ou como moito, facer que persoal dun centro teña que desprazarse a outro centro, con consecuencias médicas e económicas para a veciñanza.”
Lamentan que a Conselleira de Sanidade falase de que habería persoal de sobra para cubrir as vacacións estivais, cando no Courel non se cumpre, “Polo que imploramos a prioridade na cobertura nas zonas máis alonxadas dos Hospitais de referencia, onde só hai un médico e enfermeiro por Centro de Saúde, e se falta un supón que os seus pacientes queden desatendidos.”
Espera Courel Vivo que todos os grupos municipais traballarán por permitir calquera outro empeoramento dos Servizos Sanitarios no Courel e reclaman:
- Que desde a Corporación Municipal se solicite en conxunto, Servizos Sanitarios cubertos e dignos para o Courel, tamén en vacacións e libranzas.
- Que se lle solicite a Conselleira de Sanidade e Dirección de Primaria en Lugo, que se prioricen ás zonas máis alonxadas dos Hospitais de referencia para cubrir, cando falten profesionais do Centro de Saúde.
