Estes contratos permitirán comezar cos traballos nas concentracións parcelarias de Arcillá-Bestar-Vilar-Sisoi, Lamas e Roás, en Cospeito; e Friolfe, no Páramo. O proxecto que se licita é a colaboración de servizos técnicos para a realización do levantamento topográfico e a obtención dos planos parcelarios, a preparación das bases e o plan de ordenación de predios de especial vocación agraria nestas zonas de reestruturación.

Estes catro lotes forman parte dun total de 13 que se veñen de publicar na plataforma de contratación da Xunta cun orzamento global de case 4 millóns de euros, no que se inclúen seis parcelarias da provincia da Coruña, dúas de Pontevedra e unha de Ourense.

A través da Lei de recuperación da terra agraria de Galicia e as reestruturacións parcelarias, mobilizáronse 35.000 hectáreas en toda a comunidade nesta lexislatura. En canto ás concentracións parcelarias, dende o 2020 rematáronse un total de 30 procesos de reestruturación, abranguendo unha superficie de máis de 19.800 hectáreas e beneficiaron a máis de 14.600 propietarios. Ademais, dende o ano 2021 decretáronse 29 novas parcelarias ao longo de toda Galicia, abarcando case 24.000 hectáreas de máis de 16.300 titulares.

No vindeiro ano, o goberno galego destina 24 millóns de euros para seguir avanzando nestes procesos e véñense de publicar axudas para a mellora de infraestruturas viarias vinculadas ás concentracións parcelarias, cun orzamento de 6 millóns de euros. O prazo de presentación de solicitudes será dun mes a partir de hoxe.