A imaxe da Virxe dos Remedios da Ermida está a sufrir unha importante restauración da man do restaurador malagueño Francisco Naranjo, quen se encargou de limpar a imaxe e ten por diante facer un novo soporte para a súa exposición, así como o deseño da nova coroa que lucirá a Virxe e o Neno tras a coroación canónica. Todos estes procesos forman parte do proxecto de coroación canónica desta imaxe venerada dende hai séculos na parroquia da Ermida.
A imaxe da Virxe que se venera coa advocación dos Remedios, esconde debaixo da túnica e do amplo manto co que está revestida unha imaxe de alabastro medieval de orixe inglesa. O único á vista dos fregueses é a cabeza e unhas mans que van cosidas á túnica. Esta peza de alabastro é unha escultura de principios do século XV que conserva pálidos restos de policromía. Esta imaxe mide soamente 45 centímetros de altura polo que se construíu unha base para darlle altura e un soporte para colocarlle unha dobre coroa.
Os traballos de limpeza da Virxe por parte do restaurador malagueño empezaron e xa viron o visto e prace da Dirección Xeral de Patrimonio da Xunta de Galicia. Agora, dentro duns meses volverá para colocarlle un nimbo e acometer reparacións na coroa e na base, no soporte.
Segundo a Televisión Municipal de Quiroga, e tras falar con Francisco Naranjo, “traballar nesta peza resultoulle interesante e moi motivador, xa que ata o de agora os seus traballos centráronse sobre todo en pezas de época barroca, posto que en Andalucía as pezas románicas ou góticas son practicamente inexistentes”.
