A Pregoeira das Festas Patronais de 2024 será Dona Isabel Pardo de Vera. Así o anunciou o Alcalde, José Tomé, quen xustifica a escolla por ser esta “unha figura moi importante na historia recente da Cidade e da nosa provincia xa que sendo Presidenta do ADIF conseguiu traer unha inversión de 550 millóns de euros para mellorar e modernizar o corredor ferroviario que comunica as capitais de Lugo e Ourense a través de Monforte de Lemos“.
Abondando na importancia da súa xestión, Tomé lembrou que “esta é a maior inversión en ferrocarril da historia da Provincia de Lugo con obras que inclúen a electrificación do trazado, a renovación das vías, a implantación de novas instalacións de seguridade e o control de tráfico, melloras tamén nas telecomunicacións, a modernización de estacións como é o caso da de Monforte e a construción do novo túnel de Oural”.
ISABEL PARDO DE VERA
No que respecta á figura da protagonista do pregón deste ano, Isabel Pardo de Vera, cómpre sinalar que é enxeñeira de Camiños, Canais e Portos, iniciando a súa carreira no sector da enxeñaría e alcanzando postos de alta responsabilidade na xestión de Infraestruturas Públicas, Servizos e Regulación dos sectores Aéreo, Ferroviario, Marítimo, Carreteiras, Transporte Terrestre, Vivenda e Xeo-Información no Goberno de España.
Especializouse na coordinación e xestión de proxectos multidisciplinares de alto impacto no ámbito de multimodalidade, da enerxía e da industria, ligados sempre ao progreso económico e social dos territorios. Na actualidade é consultora autónoma en proxectos estratéxicos, docente en materia de Urbanismo e Mobilidade Sostible e docente homologada na Escola de Organización Industrial (EOI) nas materias seguintes: Entorno Económico, Transporte, Xestión e Organización de Empresas, Gobernanza e Sector Público, Responsabilidade Social Corporativa e Ética empresarial.
A TRANSCENDENCIA DOS INVESTIMENTOS FERROVIARIOS
A electrificación que se está a realizar estes anos suporá unha redución de costes operativos e un aumento nas prestacións, ademais de efectos positivos medioambientais que farán que aumente considerablemente a competitividade do ferrocarril como medio de transporte. As obras van permitir que os trens eléctricos circulen entre Ourense–Monforte-Lugo a 220-240 km/h en velocidade punta, estimando unha velocidade media en 160 km/h para percorrer os 115 kms que distan entre Ourense–Monforte-Lugo e que vai permitir chegar a Madrid no mesmo tempo que os viaxeiros que saen de cidades como Vigo ou Coruña.
Ademais, explicou Tomé, “a isto hai que engadir que durante a súa etapa na Secretaría de Estado, negociamos o novo Convenio de 7,5 millóns de euros, para facer realidade a variante urbana dende a rotonda desde a N-120 á actual N-120, que levaba parado dende 1.995 sen que ninguén conseguira sacar isto adiante e que agora, si se fará realidade”.
