A Festa da Pisa de Froxán alcanza este sábado 7 de decembro os 25 anos e faino cun programa que, sen perder a súa esencia, incorpora interesantes actividades entre as que se inclúe a presentación da Asociación Galega das Castañas e dos Soutos. E para unha edición especial, un pregoeiro tamén especial, o cantautor Emilio Rúa.
Como manda a tradición, vivirase o acendido do sequeiro e despois, sobre as 12:00 h., terá lugar a esperada demostración do Pisado e do Abandoxado das castañas secas. Trátase de quitarlle a casca de forma manual ás castañas que se foron secando polo calor do lume que se lle fixo durante días na parte baixa do sequeiro. O proceso consiste en meter uns quilos de castañas nun saco de lenzo e despois, entre dúas persoas que collen o saco polos dous extremos, golpealas contra un tallo de madeira ata sacarlle a casca. Castañas e casca van a continuación ao bandoxo para que unha persoa, con moito xeito e experiencia, separe a castaña seca da casca. O movemento acompasado do bandoxo, guindando ao aire castaña e casca, fai que a broza vaia para fóra e a castaña vaia quedando neste aparello de madeira con forma de media lúa e asas. Xan de Vilar é o referente de moitos anos neste traballo.
Ademais desta enxebre demostración, Froxán acollerá un pequeno mercado rural con postos de produtos locais e artesanía, haberá música e poderase gozar do Menú do Pisador sempre que se reserve con antelación. Este consistirá nun prato principal a base de castaña seca cocida con chourizo e panceta, e nunha sobremesa que será a Torta de Castaña. O prezo é de 15 euros por persoa e non inclúe bebida nin café.
A Asociación Fonte do Milagro, organizadora do evento, facilita a través da súa web o proceso de reserva para ese xantar.
PROGRAMA AO DETALLE
11:00.- Acendido do Sequeiro e mostra do seu funcionamento.
12:00.- Demostración do proceso de Pisado e Abandoxado da Castaña Seca animado polo grupo de música tradicional AIKIRINDO.
13:30.- Pregón a cargo do cantautor Emilio Rúa.
13:50.- Presentación da recentemente creada Asociación Galega das Castañas e dos Soutos na que intervirá o seu presidente e membros da Xunta Directiva.
14:10.- Xantar do Menú do Pisador composto por castaña seca cocida, panceta, chourizo e tarta de castaña. (Prezo Menú 15 €uros)
16:00.- Sorteo da gran cesta e outros agasallos.
16:30.- Volve a Pisa e Abandoxado onde pode participar o público.
18:00.- Foliada libre.
20:00.- FIN de FESTA.
