Despois de anunciar á artista mexicana Julieta Venegas, 17º Ribeira Sacra completa a súa proposta co grupo estadounidense The Jayhawks, a banda francesa Exsonvaldes, o compositor español Ángel Stanich ou os ingleses Wings of Desire. A estes concertos, que se repartirán en diferentes escenarios singulares da Ribeira Sacra como Adegas Regina Viarum, súmase o Concerto Sorpresa Momentos Alhambra, unha das experiencias máis esperadas na que o público vivirá a mellor música en directo a bordo dun catamarán polo río Sil. Os abonos xa están á venda na páxina web do festival.
Ademais, tamén se poderá gozar coa música a artista de orixe británica Laverca Bentley e Cosmic Wacho, cun directo que non deixará a ninguén indiferente. Tamén están no cartel Anxo Araújo, Allova e Néstor Pardo, propostas coas que o público poderá achegarse a artistas galegos en escenarios únicos.
EXPERIENCIAS GASTRONÓMICAS, PATRIMONIAIS E PAISAXÍSTICAS
A programación musical completarase cunha proposta de gastronomía e experiencias arredor do patrimonio e da paisaxe. Un formato de festival que aposta tamén polo coidado do territorio, con medidas de sustentabilidade e un aforo adecuado á contorna.
Proximamente darase a coñecer a programación de Experiencias, accións en pequeno formato arredor da paisaxe da Ribeira Sacra, a gastronomía, o patrimonio ou a arte para ofrecer ao público unha viaxe a través da historia e vangarda do territorio.
Ademais, queda por desvelar a proposta gastronómica, que nesta edición destacará por ampliar e diversificar a súa oferta dando un lugar destacado á gastronomía local. Como é habitual, tamén contará con recoñecidos chefs galegos.
PIONEIRO NO MODELO DE ‘FESTIVAL TERRITORIO’
17º Ribeira Sacra é o primeiro evento de marca “Festivais Territorio”, unha aposta da promotora galega i-radia Crea por crear festivais respectuosos co territorio cunha programación diversa en distintas zonas maioritariamente rurais. Este mes, o 17º Ribeira Sacra foi recoñecido como Mellor Festival en Pequeno Formato nos Iberian Festival Awards por cuarto ano consecutivo sendo finalista tamén en Best Contribution to Sustainability e Best Brand Activation. Os festivais irmáns Esférica Rioxa Arabesa (País Vasco); Terra Bobal Fest e Nómade (Comunidade Valenciana) e Canari (Illas Canarias) seguen o seu modelo en diferentes puntos do territorio nacional.
