O Concello de Sober vén de asinar días atrás un acordo de colaboración en concepto de patrocinio coa Asociación Deportiva 3CUMIOS para o ascenso ao Huascarán, o primeiro dos 3 cumios que intentarán coroar 3 alpinistas da Comarca de Lemos no mes de xullo deste 2025. A asociación pretende, con esta ambiciosa aventura de ascender a montañas representativas de tres continentes, utilizar a iniciativa para promover a Ribeira Sacra e Galicia no ámbito internacional.
“Esta colaboración contribuirá de forma directa ao desenvolvemento do proxecto, incluíndo a súa vertente social, que contempla a adquisición e entrega de material escolar e deportivo en comunidades desfavorecidas”, comentan dende o concello.
Un dos seus promotores, Manuel Vieitez, é natural de Sober e explica que esta institución “foi a primeira en crer no noso proxecto e en apoiarnos desde o inicio. Grazas por acompañarnos nesta aventura que levará o nome dea nosa terra ata o máis alto”.
