As portas do recinto dos concertos abriranse o venres ás 21.00 horas e o sábado ás 20.30 horas, pero o inicio da programación adiantarase xa ao venres ás 17.00 horas cun encontro no lugar de Manán titulado ‘Fíos que unen: un encontro intercultural”. Esta proposta incluirá un concerto acústico de Samuel Martins Coelho e charlas coa participación de representantes de diversas asociacións culturais de Sarria.

Os organizadores, Asociación Cultural Ribela, destacan o Ribela Love Nature como un espazo de encontro, liberdade, sostibilidade e experimentación cultural, no que se aposta por unha programación que combina vangarda e identidade local, co obxectivo de contribuír a consolidar a Galicia como un lugar clave dentro do circuíto europeo da música electrónica alternativa.

Da presentación do acto participaron representantes da organización e de entidades colaboradoras; coa asistencia da directora territorial da Consellería de Emprego, Comercio e Emigración, Carmen José López e o Vicepresidente da Deputación Provincial, Efrén Castro.