Cun investimento de 440.000€ actuarase na mellora e rehabilitación destas igrexas históricas da provincia situadas nos concellos de Antas de Ulla, Sarria, Monforte de Lemos, Monterroso, A Pobra do Brollón, O Corgo e A Fonsagrada.

As actuacións incluídas no convenio consisten fundamentalmente na reparación e renovación de cubertas, eliminación de filtracións, mellora de accesibilidade e acondicionamento de espazos para uso cultural. Concretamente, o documento recolle as seguintes actuacións:

En Monforte, na igrexa de Santa María de Rozavales, renovarase a pizarra e a madeira que estea en mal estado e colocaranse canalóns semicirculares con 39.300€. Na igrexa de Santa María da Penela, acondicionarase a cuberta con 44.000€; e na de Santa María de Baamoorto restaurarase a tella da cuberta do adro da igrexa con preto de 29.400€.

Na igrexa de San Xosé de Oural, en Sarria, acometerase cun investimento de case 87.300 euros para a eliminación de humidades ocasionadas pola filtración de auga a través da cuberta de pizarra, mellorar a accesibilidade e a seguridade.

Na igrexa de San Salvador de Ferreiros, na Pobra do Brollón arranxarase a cuberta substituíndo a lousa e a madeira en mal estado.