Entre outras cuestións, Arias avanzou que a Xunta executará obras de conservación e mellora do firme en varios puntos da estrada autonómica LU-611, que conecta Taboada con Rubián (Bóveda). Os traballos acometeranse con cargo ao contrato de mantemento das estradas da zona sur da provincia de Lugo e comezarán cando melloren as condicións climatolóxicas.
Por outra banda, Arias informou ao rexedor da próxima publicación da orde anual de axudas a pequenos e medianos concellos para que rehabiliten edificacións da súa propiedade que están en desuso e as dediquen a alugueiro social. Esta edición increméntase nun 30% o importe máximo que se concederá para cada vivenda ata chegar aos 65.000 euros con carácter xeral. Nas zonas Rexurbe e áreas de rehabilitación dos Camiño de Santiago e a Ribeira Sacra, a contía alcanzará os 68.000 euros. A Xunta poderá cubrir ata o 95% dos gastos subvencionables.
Outro asunto tratado foron as colaboracións que ofrece a Consellería de Presidencia, Xustiza e Deportes para restaurar inmobles destinados a locais sociais. Arias concretou que anualmente se convoca unha orde de axudas para cooperar coas asociacións de veciños no acondicionamento dos espazos nos que realizan as súas actividades. O ano pasado resultaron beneficiarias 72 organizacións da provincia de Lugo que percibiron achegas por valor total de 653.200 euros. Entre elas figuran dúas de Taboada, San Blas de Tuiriz e Castro Celta.
