Rafa Centeno reivindica os viños de Amandi “como unha maneira de vivir e de entender o mundo”. O cociñeiro recoñeceuse emocionado por ser elixido para pronunciar o pregón e asegurou que na mesa nunca está só, “porque sempre hai algo que acompaña, que eleva, que fala. E ese algo son os vosos viños”. Uns viños que asegurou, “falan de tradición, de historia, de cultura, de identidade e dunha maneira de vivir e entender o mundo”. “É por iso que alá onde vain sorprenden, emocionan, deixan pegada”, destacou.
O punto e final do pregón que foi seguido pola gran cantidade de público presente fíxose cun brinde: Viva o viño de Amandi, viva Sober!!. Pola súa banda, o alcalde de Sober, Luis Fernández Guitián, tivo palabras de recoñecemento para o pregoeiro de quen destacou o seu vínculo co municipio. No seu discurso agradeceu tamén a asistencia de quen se achega cada ano á Feira do Viño de Amandi e o esforzo de todos os que fan posible esta celebración.
“Estamos aquí, un ano máis, para degustar a última colleita, máis curta do habitual en cantidade pero sobresaínte en calidade. E con esta feira queremos que a nova colleita sexa tamén frutífera en amizades e, como non, en recompensas ao esforzo de todo un ano”, sinalou. O rexedor referiuse tamén á candidatura da Ribeira Sacra a Patrimonio da Humanidade: “En catro meses o Comité de Patrimonio Mundial da Unesco decidirá se a Ribeira Sacra é Patrimonio da Humanidade. Vai selo”.
Viños gañadores XLVI Feira do Viño de Amandi
Tinto (son os tres gañadores):
- Cruceiro Mencía 2025 de Adega Cruceiro
- Don Bernardino Mencía 2025 de Adega Don Bernardino
- Romeo Domain 2025 de Adega Gullufre
Branco:
- Cruceiro Rexio Godello 25 de Adega Cruceiro
- Mellor rosado xoven:
- Priscillus Rosado 2025 de Adega A Man de Prado
Mellor tinto barrica:
- Adega Parcela Carballo Cobo 2021 de Adega Algueira
Mellor viño doutras colleitas:
- Cividade Mencía 2024 de Adega Cividade
Todos eles levaron un diploma e unha peza de Gundivós. O Concello homenaxeado este ano foi o de Ribas de Sil. O seu alcalde, Roberto Castro, recibiu un agasallo institucional de mans do rexedor soberino.
Premiados Feira do Viño de Amandi 2026 / Concello de Sober
