O Boletín Oficial da Provincia (BOP) de Lugo vén de publicar o Regulamento de Funcionamento e Admisión do Viveiro Industrial de Empresas do Concello de Bóveda (https://www.deputacionlugo.gal/gl/node/84101). O alcalde de Bóveda, José Manuel Arias, destaca que “a publicación deste regulamento supón un paso decisivo para a posta en funcionamento do viveiro industrial e permitirá darlle continuidade ao proceso de incorporación das primeiras iniciativas empresariais, contribuíndo así á creación de emprego no municipio”.
Este regulamento ten como obxecto establecer o funcionamento do Viveiro Industrial de Empresas do Concello de Bóveda. Así, define o procedemento de adxudicación dos espazos, así como as relacións entre os cesionarios e o órgano de xestión e as normas de réxime interno das instalacións.
O viveiro ten como finalidade ofrecer, mediante cesión temporal, un espazo físico equipado para o funcionamento de negocios. Entre os seus obxectivos figuran favorecer a creación e consolidación de novas empresas e impulsar a xeración de emprego na localidade. Faise mediante a cesión dun espazo con localización, infraestrutura, loxística e servizos que permitan ás iniciativas empresariais, en condicións favorables de prezo e servizos, desenvolver o seu plan de empresa nun tempo limitado, co obxectivo de que poidan competir posteriormente en condicións de mercado.
O Viveiro xestionarase directamente a través do Concello. Entre os servizos previstos inclúense o acceso a servizos telemáticos e de reprografía, limpeza e mantemento das instalacións, así como servizos de asesoramento, información e formación empresarial en ámbitos como bonificacións e subvencións, mellora da competitividade industrial, TIC, dinamización empresarial e cultura emprendedora. Tamén servizos de organización de eventos e de xestión e relación cos medios de comunicación.
Condicións para a utIlización do Viveiro
O Viveiro Industrial de Empresas está dirixido a persoas físicas ou xurídicas con proxectos de creación de negocio ou a empresas de recente creación que conten cun plan empresarial viable desde o punto de vista económico e técnico. Poderán acceder tanto empresas aínda non constituídas, sempre que se comprometan a formalizar a súa constitución no prazo máximo de seis meses desde a resolución de acollemento, como empresas xa creadas que non superen os doce meses de antigüidade no momento de presentar a solicitude.
As iniciativas deberán desenvolver unha actividade empresarial de carácter industrial e ter o domicilio social e fiscal no municipio de Bóveda ou comprometerse a trasladalo nun prazo máximo de seis meses no caso de resultar seleccionadas. De maneira excepcional tamén poderá autorizarse a incorporación doutro tipo de proxectos vinculados á cadea de valor industrial ou que acheguen valor engadido ao tecido produtivo local. Cada persoa ou entidade beneficiaria poderá optar a un único espazo e deberá estar ao corrente das súas obrigas tributarias e coa Seguridade Social.
A selección das iniciativas empresariais realizarase mediante convocatoria pública e será avaliada por unha comisión de selección, que terá en conta criterios como a viabilidade técnica, financeira e económica do proxecto, o nivel de creación de emprego, o carácter innovador da actividade ou determinados aspectos sociais. As convocatorias publicaranse no BOP, no taboleiro de anuncios do Concello e na páxina web municipal. As empresas poderán permanecer nas instalacións durante un período inicial de doce meses, prorrogable por períodos iguais ata un máximo de corenta e oito meses.
A construción do viveiro empresarial supuxo un investimento de arredor de 450.000 euros, financiado nun 80 % pola Xunta de Galicia e nun 20 % polo Concello de Bóveda. Posteriormente, o Concello obtivo tamén unha axuda da Xunta de Galicia para a mellora das instalacións, dotación e equipamento do viveiro, cun investimento de máis de 51.600 euros destinado a mellorar as prestacións do edificio, a eficiencia enerxética e as infraestruturas técnicas.
Viveiro de Empresas de Bóveda / Concello de Bóveda
