Durante a reunión de traballo entre o alcalde do Incio, Héctor Corujo, e o presidente da Xunta, Alfonso Rueda, o rexedor agradeceu a boa disposición do xefe do Executivo autonómico coas necesidades que lle trasladou.

En concreto, ambos os mandatarios abordaron a situación na que se atopa a Casona da Cruz do Incio, propiedade da Deputación de Lugo e que leva anos á espera de rehabilitación. O presidente expresou o seu compromiso de colaborar na súa rehabilitación na mesma medida que o faga a institución provincial de cara a recuperar o inmoble para convertelo nun espazo público aberto para os veciños e veciñas.

Nesta que foi a primeira reunión que o rexedor mantén co presidente, tratouse tamén a importancia de recuperar o antigo balneario da Ferrería, o estudo do desenvolvemento dun polígono industrial na localidade ou o impulso do itinerario cultural Eufrasiano, para o que se podería optar a axudas da administración galega.