A Consellería de Emprego, Comercio e Emigración destina 454.500 euros a financiar a sexta edición do obradoiro dual de emprego “Sarria, Camiño de Santiago”, que continúa cos labores de rehabilitación no Campo da Feira da vila.

No obradoiro participan 20 persoas desempregadas, que durante nove meses recibirán formación e adquirirán experiencia profesional en oficios con boas perspectivas de inserción laboral; en concreto, 10 aprenden a especialidade de Fábricas de albanelería e outros tantos a de Instalación de elementos de carpintería.

Villares destacou que estas iniciativas “deixan pegada nos participantes, que reorientan a súa traxectoria profesional, e no territorio, como demostra a transformación que está a experimentar este Campo da Feira, cada vez máis renovado e funcional grazas ás reformas que van incorporando as distintas edicións do taller”.

O proxecto actual acometerá a rehabilitación do pendello do polbo -xa hai cinco restaurados no recinto-, o recubrimento da fachada da nave do Mercado Gandeiro, a reforma interior dos aseos públicos e o acondicionamento de muros, entre outras actuacións.

Actualmente estanse desenvolvendo 16 obradoiros duais de emprego na provincia de Lugo e tramítase a resolución da segunda convocatoria, que sumará novos proxectos a executar no bienio 2026-2027.

Obradoiro de Emprego Sarria / Delegación territorial