A protagonista será Loyda López Pérez, unha emigrante retornada, que con sete anos marchou para Montevideo (Uruguay). Tras dezasete anos nesta cidade, viviu en Barcelona e Mallorca; e no ano 2012 veu para facer de Quiroga a súa residencia habitual.

Loyda naceu en Vilar do Mato e aínda que marchou con sete anos ten moitos recordos da súa aldea natal, recordos que compartiu no seu primeiro libro publicado “Loyda. Yo nací y me crié en la última aldea celta de Galicia”. Aínda que Loyda, como ela mesma se definiu, é unha pintora que escribiu un libro; narra na súa obra a vida na casa dos seus avós que vivían nunha aldea de Ribas de Sil.

Este repaso pola vida das aldeas a mediados do século XIX será o tema central dun Faladoiro no que se compartirán lembranzas das orixes dos participantes, dando unha visión positiva ao sentimento de morriña.

O Faladoiro é unha actividade que promove o Concello de Quiroga dende a Concellería de Servizos Sociais e Participación Cidadá, moderado polo concelleiro Xosé Manuel Fernández. Trátase dun espazo aberto á veciñanza para a socialización, o coñecemento e a participación cidadá, onde tras unha breve presentación da persoa convidada, os participantes poden intervir con preguntas ou contando as súas propias experiencias.