A Garda Civil detivo a dous veciños de Sober de 32 e 40 anos de idade como supostos autores de delitos de furto e pertenza a grupo criminal tras subtraer un martelo hidráulico de 1.200 quilos, valorado en 10.000 euros das obras de acondicionamento da autovía A-6 ao seu paso por Baralla. Diso informou o Instituto armado, que explicou que as actuacións leváronse a cabo no marco da operación Perba e que, dado o peso e as dimensións do obxecto subtraído, os autores necesitaron un longo período de tempo para proceder á súa carga e posterior traslado do lugar.
A investigación policial conduciu aos axentes ata os presuntos autores, que están vinculados ao sector madeireiro forestal. Os arrestados utilizaban o martelo hidráulico subtraído nos traballos que desempeñaban, para o que o reformaron e adaptaron para axustalo a unha escavadora da que facían uso. A Garda Civil logrou recuperar nun monte forestal da localidade de Baleira-Lugo o obxecto subtraído, que estaba desmontado no momento de ser localizado posto que lle estaban efectuando unhas reparacións.
A máquina foi devolta ao seu lexítimo propietario, a quen a subtracción causara un gran prexuízo ao tratarse dun obxecto imprescindible para o desempeño de actividade laboral. A investigación policial segue aberta e non se descartan máis detidos. Os dous individuos foron postos a disposición do Xulgado de primeira instancia e instrución de Becerrea.
