O Goberno local do Concello de Bóveda vén de aprobar este venres no Pleno Municipal os Orzamentos para o 2021. Dentro dos mesmos acordouse incluír unha partida para subvencionar o 100% das licenzas de obra das vivendas unifamiliares da localidade. En concreto, subvencionarase o 100% sobre o imposto de construción para a rehabilitación interior e exterior, reconstrución ou construción de obra nova das vivendas unifamiliares.
Esta medida será efectiva unha vez que entren en vigor os orzamentos municipais de 2021 e terá carácter retroactivo, de maneira que se poderán beneficiar dela todo os veciños e veciñas que pagaran o imposto de construción desde o día 1 de xaneiro deste ano e estará vixente ao longo de todo o ano 2021.
ORZAMENTOS PARA 2021
Os orzamentos para o 2021, que ascenden a 1.426.031 euros, contaron cos votos a favor do equipo de Goberno, do PP, e a abstención do PSOE. Cómpre salientar nas contas aprobadas a dedicación para o gasto social (292.450 euros) e para investimentos reais.
Entre os principais proxectos atópanse fondos propios para o IDAE, para seguir avanzando no cambio de luminarias LED na Avenida San Vicente de Ver, no Parque Empresarial, na Avenida Alfonso XIII, na Avenida de Galicia e na Avenida de Santiago, entre outros lugares. E tamén se contempla a construcción dunha nave para albergar o viveiro de empresas, á que o Goberno local destina 65.000 euros; a pasarela da contorna do Río Mao, a compra dun vehículo eléctrico ou os 30.000 euros que van destinar a mellorar o firme das estradas naqueles puntos onde se atopa máis deteriorado.
O Goberno local destacou outras accións ás que se destinan recursos públicos dentro do orzamento como son as subvencións para a gardería, para asociacións e clubs de fútbol, así como a partida destinada a un novo obradoiro de emprego, a achega ao Consorcio de Turismo da Ribeira Sacra e a participación no proxecto empresarial Semente Ribeira Sacra, entre outros.
TAXA SOBRE EXPEDICIÓN DE DOCUMENTOS
No mesmo Pleno deste venres, 12 de marzo, a Corporación acordou tamén modificar a ordenanza fiscal que regula a taxa sobre a expedición de documentos. Esta modificación implicará a baixada do importe para a maior parte delas e incluso a retirada nalgún caso.
