O Alcalde de Monforte, José Tomé Roca, antes de expoñer o programa de actividades para a celebración do 8M quixo pronunciarse a favor do movemento feminista dicindo que no equipo de goberno local traballan co obxectivo de sentar as bases para “facer real e efectiva a igualdade entre homes e mulleres”, e deste xeito organizan “actividades e propostas transformadoras que contribúan a eliminar na nosa sociedade as estruturas machistas e patriarcais que desgraciadamente seguen presentes no fondo de toda estrutura social y política das nosas vidas”.

A continuación deuse conta do programa de actividades ideadas dende a Concellería de Muller e Igualdade do Concello de Monforte, en colaboración co Centro de Información á Muller (CIM), que se desenvolverán entre os días 5 e 25 de marzo.

“MONFORTE POLA IGUALDADE”

Baixo este lema levarase a cabo unha campaña informativa e de sensibilización que consistirá na colocación de carteis por distintas zonas da cidade con mensaxes visuais e atractivas sobre o empoderamento das mulleres, a igualdade real, a corresponsabilidade e a rotura coas brechas de xénero que seguen persistindo na sociedade.

Así mesmo, instalarase un vinilo no Bus Urbano municipal co lema da campaña e iluminarase de cor malva a Torre da Homenaxe. Sobre este edificio emblemático da cidade farase tamén unha proxección dixital co lema da Campaña “Monforte pola Igualdade”, o propio día  8 de marzo, das 19:30 h. ás 00:00 horas.

ACTO CENTRAL, 8 DE MARZO

Este día farase a lectura do manifesto diante da Casa do Concello ás 12:30 h. lectura que correrá a cargo da Concelleira de Muller e Igualdade, Margarita López Rodríguez.

A continuación, Iara Rodríguez González e Lujie Prieto Robisco, alumnas de violín do Conservatorio Municipal ‘Mestre Ibañez’, interpretarán un fragmento do “Canon en Re Mayor ” de Johann Pachelbel.

OUTRAS ACTIVIDADES PROGRAMADAS

Como en anos anteriores, haberá obradoiros destinados á sensibilización e toma de conciencia entre o alumnado de centros de ensino. Haberá un obradoiro –os días 4, 16 e 18 de marzo– a cargo da psicóloga clínica Paula Sánchez destinado ao alumnado de Educación Secundaria –3º ESO– titulado “Para que non doa” no que se traballaran as relacións emocionais dende unha perspectiva non sexista, as dependencias emocionais e o que ten que ver coas formas de respecto e boa relación co obxectivo de que o alumnado cuestione os mitos e falsas crenzas en torno o namoramento e o amor, diferencien entre relacións igualitarias e relacións violentas, de dependencia, etc convidándoos a que reflexionen sobre os modelos impostos nas relacións afectivas.

“Escape Room pola igualdade”

Esta é a actividade máis novidosa no programa deste ano e vai dirixida tanto ao alumnado de 6º de educación primaria como ao público en xeral.

Segundo explicou o rexedor, “trátase dun Escape Room en Igualdade de Xénero, un xogo cooperativo, unha ginkana de interior que se recrea nunha sala especial, na que un grupo de persoas teñen que superar probas, descifrar códigos e enigmas para abrir candados e maletas, e poder saír deste espazo interior”.

Desenvolverase, en cada un dos centros participantes, os días 8, 9, 10 e 11 de marzo e na opción para público de todas as idades os venres 18, 19 e o domingo 20 de marzo. O Centro Cívico Social será o lugar de realización e farase para grupos reducidos de 6 a 8 persoas, tendo que ir acompañados os menores de 12 anos. Para inscribirse haberá que dirixirse ao CIM, no teléfono 982 416 350 ou correo electrónico cim@concellodemonforte.com. A inscrición realizaranse por orde de anotación ata rematar o número de prazas dispoñibles.

Dada a situación sanitaria actual pola COVID-19 tomaranse ás medidas de hixiene e sanidade  tales como, redución de número de participantes, grupos pechados, aforo, uso de xel  hidroalcóholico, máscaras e tempo entre grupos para desinfección e limpeza da sala.

Como cada ano tamén o teatro será protagonista dentro das actividades organizadoas co gallo do 8M. Así, pois, os xoves 17 e 24 de marzo, e o xoves 7 de abril, poderanse ver as obras: “Comando Comadres”, da compañía Matrioskha Teatro, “Cigarreiras”, da compañía Contraproducións, e “Tabú”, da compañía Tarabela Creativa.

O horario das tres obras será ás 20.15 horas e terán lugar no Edificio Multiusos. A primeira das obras terá entrada gratuíta, e as outras dúas terán unha entrada de 5 euros para persoas adultas e 3 euros para persoas desempregadas e xubiladas.

As actividades están financiadas polo Concello de Monforte e con cargo aos fondos transferidos pola Secretaría de Estado de Igualdad y contra la Violencia de Género, para o desenvolvemento de novas ou ampliadas competencias reservadas ás entidades locais no Pacto de Estado contra a violencia de xénero para o exercicio 2021.