A concentración, que se desenvolveu diante do centro hospitalario, foi seguida por unhas 200 persoas que corearon unha demanda clara, “queremos especialistas para o noso hospital”, ante a constante falta de profesionais das diferentes especialidades.

Pladesapu anunciaba que se sumaría a concentración porque “seguimos a carecer de rehabilitador, e temos tamén mermados os servizos de hematoloxía e dixestivo por ausencias que seguen a estar sen cubrirse máis que puntualmente. O mesmo está a ocorrer coa psiquiatría, que sigue cunha soa profesional a efectos prácticos, en lugar de dúas. Esta situación vímola vivindo dende hai meses, a pesar de que en múltiples ocasións se nos asegurou que se cubrirían nun breve periodo de tempo. Hai moitas papeletas para que calquera profesional que se poña de baixa sexa un profesional menos desenvolvendo a súa actividade no centro.”

Consello Municipal de Saúde

O salón de plenos da casa consistorial de Monforte acollía este mércores reunión do Consello Municipal de Saúde. O alcalde deu conta da falta de especialistas en hematoloxía, dixestivo, rehabilitación, neuroloxía, psiquiatría, pediatría, etc., e tólodos participantes fixeron as súas aportacións, acordando por unanimidade facer un recopilatorio de datos referente ás especialidades que están sen cubrir, ou que carecen de especialistas total ou parcialmente, así como a falta de enfermeiras e enfermeiros, e dirixirse tanto ó Xerente da Área Sanitaria de Lugo como á Consellería de Sanidade da Xunta de Galicia para demandar que se cubran as prazas de forma urxente.

O Consello Municipal de Saúde tamén daba o seu apoio unánime á concentración deste mércores “consideramos que a propoña quen a propoña, o que se están a defender son os intereses dos cidadáns de Monforte de Lemos e da comarca, considerando que a sanidade é un dereito fundamental de todos e de todas” subliñou o alcalde.