O alcalde de Monforte, José Tomé Roca, e o responsable do Grupo Fenestra-Alumetal, Miguel de la Fuente, veñen de presentar o proxecto de construción dunha nova nave de Fenestra no Polígono do Reboredo, acompañados polo arquitecto que a deseñoi, Ramón Rodríguez do estudio Abante.
O Grupo Fenestra-Alumetal adquiriu unha parcela de 28.000 m2, ubicada xunto á parcela que adquiriu Kern Pharma. Construirase unha nave do tamaño dun campo de fútbol, é dicir, 10.000 m2 – 1 hectárea, o que lle vai permitir ter unha capacidade de produción de 400 ventás diarias, aumentando exponencialmente a súa capacidade de produción actual, e que están destinadas á exportacións dentro e fóra de Galicia.
“Un dato que da unha boa medida da importancia deste proxecto empresarial, é que vai realizar un investimento superior ós 8 millóns de euros, e vai xerar varios postos de trabalo, aumentando a plantilla nun 25% nesta primeira fase, dado que vai ser unha planta moi automatizada, con máquinas de última tecnoloxía”, subliñou José Tomé.
Desde a súa fundación no ano 2.000 polos irmáns Jorge e Miguel De La Fuente do Grupo Fenestra – Alumetal o seu traballo foi sinónimo de calidade e innovación no sector da carpintería de altas prestacións. Nos seus 25 anos de experiencia, a empresa destacouse por ofrecer solucións eficientes que melloran a calidade de vida das persoas e o medio ambiente, logrando un crecemento medio anual, na súa cifra de negocio, superior ao 30%. Actualmente conta cunha plantilla de 38 postos directos, e coa nova nave, prevé incrementar en 10 postos máis dita plantilla. Os principais mercados do Grupo Fenestra-Alumetal están en Galicia, Madrid e norte de Portugal.
Nova nave Fenestra / Concello de Monforte
A construción do novo centro de produción en Monforte de Lemos permitirá á empresa, non só atender a crecente demanda de xanelas de altas prestacións, senón tamén consolidar a súa posición como líder no sector da carpintería de PVC de altas prestacións. A previsión do Grupo é rematar a fábrica a finais do ano 2025 ou principios do 2026, e acadarán unha nave 4 veces máis grande que a que teñen actualmente no Polígono. As obras de construción da mesma xa deron inicio, levándose a cabo a cimentación, e comezando coa colocación da estrutura metálica.
