A localidade de Sarria conta cun gran centro asistencial para persoas con discapacidade con aproximadamente 120 prazas das cales na actualidade haberá unhas 115 ocupadas segundo nos conta persoal do propio centro. Dos internos/as hai xente da contorna pero tamén usuarios de diferentes puntos da xeografía nacional e atenden deles uns 170 traballadores de media, tendo en conta que hai épocas do ano nas que o persoal contratado pode aumentar.
Dende o ano pasado o director é o sarriano Luís Pardo Fernández que tomou o relevo de Avelino Méndez, tras a súa xubilación. No día propio da efeméride, 26 de outubro, estivo presente o delegado territorial da Xunta en Lugo, José Manuel Balseiro, que agradeceu o traballo que realizan cada día os profesionais que traballan no centro e tamén a implicación das familias. Balseiro destacou ademais que a Xunta está “ao lado dos colectivos máis vulnerables, reforzando o gasto social para mellorar servizos públicos como este”. Neste sentido aproveitou para lembrar que se acometeron recentemente diferentes obras de acondicionamento no centro por importe de máis de 52.000 euros; melloras consistentes na reparación da cuberta, renovación do chan da lavandería, traballos de pintura, adaptación da cociña e da instalación da calefacción para a conexión do gas natural.
Abondando nas melloras, e de cara ao futuro próximo, está prevista a adquisición de dous guindastres de elevación e un de bipedestación, mellorando así as infraestruturas e o equipamento necesario para atender ás necesidades dos usuarios.
Na celebración do seu vixésimo cuarto aniversario están programadas para os usuarios/as do CAPD unha serie de actividades consistentes en actuacións musicais, obradoiros de pinta-caras, globoflexia e xogos.
