O Concello de Sober vén de celebrar a XXVIII Feira da Rosca e o VII Túnel do Viño de Amandi, unha cita que encheu de xente a capitalidade municipal e que marca cada ano un dos días grandes de visitas no calendario estival.
Os postos de artesanía e gastronomía abriron ás 10:00 horas para ofrecer os produtos típicos desta celebración, entre eles a rosca e o mel, e ás 11:00 horas houbo unha demostración de talla con motoserra a cargo de Eugenio Linares, quen elaborou un banco cunha rosca e unha vide.
De 11:00 a 13:00 horas desenvolveuse o obradoiro de feltro para todos os públicos a cargo de Ovella Viva. Á mesma hora deu comezo un obradoiro de cestaría en vivo a cargo do CENTRAD da Vicepresidencia da Deputación de Lugo.
Ás 12:00 horas actuou o grupo de música tradicional Os Valouros no marco do programa Tradigalu da Vicepresidencia da Deputación de Lugo, e ás 13:00 horas celebrouse a tradicional degustación da rosca de Sober, un dos momentos máis esperados da Festa da Rosca. Repartíronse nesta ocasión 2.000 racións de rosca con queixo. A devandita degustación é gratuita, faise por cortesía do Concello de Sober e conta coa colaboración de Queserías Prado.
TÚNEL DO VIÑO DE AMANDI
Paralelamente ás actividades programadas levouse a cabo o VII Túnel do Viño de Amandi, actividade que xa abriu as súas portas na tarde de onte.
No evento, organizado por Vinosacra, participaronn 25 adegas e 50 referencias de viños da subzona de Amandi e Sober que se puideron degustar nunha carpa instalada na Praza do Concello. Neste evento colaborou ademais a empresa cárnica lucense Torre de Núñez.
