O expresidente do BBVA Francisco González –natural de Chantada–, chegou á Audiencia Nacional pasadas as 9,35 horas deste luns para declarar como investigado polos contratos que a entidade subscribiu durante anos coas empresas do comisario xubilado e en prisión provisional José Manuel Villarejo.
González está citado ás 10,00 horas por supostos delitos de suborno e revelación de segredos, media hora despois que o ex dircom do BBVA Javier Ayuso, que fora convocado en calidade de testemuña neste procedemento.
Á súa chegada, mostrouse tranquilo e riseiro e declinou facer comentarios aos medios porque, segundo dixo “non é o momento de falar”.
Segundo fontes xurídicas, ten intención de declarar e responder o xuíz e a Fiscalía Anticorrupción, nunha estratexia distinta á seguida por outros ex executivos do banco investigados e que se acolleron ao seu dereito a non contestar tendo en conta de que as actuacións permanecen baixo segredo.
A investigación de González acordouse a instancias de Anticorrupción no marco da peza separada número 9 da macrocausa Tándem que investiga as actividades ilícitas de Villarejo, quen estaría desempeñando tarefas de información e espionaxe para o BBVA durante máis dunha década e por importe superior a 10 millóns de euros.