Lavado de cara para un edificio emblemático

La Unión de Sarria vén de inaugurar as obras de mellora que executaron no edificio que lles serve de sede e que supuxeron a rehabilitación da galería contruída no século XIX.

La Unión de Sarria / La Unión

A sociedade cultural e recreativa La Unión desenvolve a súa actividade nesta contrución tan característica en Sarria. O edificio, do século XIX, presenta partes moi deterioradas, entre elas a galería. Foi precisamente a galería o espazo no que se concentraron as obras para as que se utilizou madeira de castiñeiro. Tamén se cambiaron os canalóns de recollida de auga para evitar o deterioro da nova balconada. Na financiación destas obras colaborou a Deputación Provincial con 40.000 euros. Segundo o ente provincial, estas melloras non só benefician aos socios de La Unión, senón á totalidade dos 13.500 sarrianos ao tratarse dun dos edificios máis emblemáticos e fermosos da vila.

A sociedade La Unión é unha veterana entidade con gran implantación e tradición na vida de Sarria, con máis de 500 familias socias. A entidade cumprirá os 100 anos no 2019 e ten a súa orixe nunha asociación, o Clube Celita de Fútbol, da que foi impulsor o famoso toureiro sarrián Celita.

 

Ten a súa sede neste edificio dende hai case noventa anos, primeiro en alugueiro e despois en propiedade. O edificio fóra construído a finais do século XIX para residencia do industrial e político Venancio Vázquez López, sobriño doutro sarrián ilustre, o empresario, deputado e filántropo Matías López. O edificio levántase nunha finca de 4.000 metros cadrados no centro de Sarria.

Sociedade La Unión / PSOE provincia de Lugo

DEIXAR UN COMENTARIO

Please enter your comment!
Please enter your name here