O Concello de Sober fixo entrega nesta fin de semana dos premios dos certames convocados durante o Nadal. Aos tradicionais concursos de beléns, postais e poesía sumouse este ano o de decoración de locais comerciais.
O alcalde, Luis Fernández Guitián, foi o encargado de entregar os agasallos aos gañadores e tamén aos participantes en diferentes quendas ao longo da tarde, para dar cumprimento ás medidas anticovid.
Fernández Guitián agradeceulles a todos e todas a participación nos certames. Os nenos e nenas gañadores recibiron un diploma e material escolar, mentres que o establecemento gañador, a Casa dos Arcos, recibiu tamén unha peza de Gundivós.
