Sarria acolle desde este luns e ata o 20 de xullo unha nova edición do Festival Ultreia e Suseia, que organiza a empresa local Etiqueta Negra e que conta coa colaboración, entre outras entidades, da Xunta de Galicia e da Vicepresidencia da Deputación.

O festival concede especial protagonismo ás asociacións culturais da comarca, que participan activamente nas actividades. Os actos que se ofertan ao longo da semana están pensados para todo tipo de públicos e idades.

Ademais de propostas que xa tiveron éxito noutras edicións como as Camiñografías – paseos escénicos pola vila – este ano haberá algunhas novidades, como as primeiras Olimpíadas Rurais.

O delegado territorial, Javier Arias, gabou a “orixinalidade” deste festival, que valorou como “unha gran oportunidada para exhibir todo o traballo cultural que se fai en Sarria” e promocionar “o talento artístico que temos en Galicia”.

Tamén suliñou que a Xunta aposta por descentralizar a oferta de actividades culturais e de ocio para que toda a cidadanía poida desfrutar delas. “Para iso o Goberno galego colabora coa programación organizada por entidades de toda a provincia”, ademais de impulsar distintos programas como Cultura no Camiño, que achega unha programación diversa e de calidade a diferentes concellos lucenses.

Pola súa banda o vicepresidente da Deputación de Lugo Efrén Castro, destacou a aposta do colectivo por incorporar ao programa ao tecido cultural e asociativo de Sarria e da comarca, “un compromiso que asumimos como propio desde a área de Cultura e que guía tamén a colaboración con este festival con propostas como o paseo teatralizado e a foliada aberta prevista para o 20 de xullo”.