O Concello de Monforte convida a un novo espectáculo de maxia, nesta ocasión dentro do ciclo ‘Ler conta moito’, iniciativa que impulsa economicamente a Consellería de Cultura, Educación e Universidade da Xunta de Galicia
Baixo o título de “Mago Deimi: a maxia está nos libros” preséntase unha actividade de maxia na que os protagonistas son os libros. Haberá números de maxia sorprendentes para que os pequenos e pequenas entendan a lectura como unha experiencia máxica , chea de ilusión: aparición de moedas dentro de libros, libros que se colorean por arte de maxia, carta debuxada con maxia nun bloc, peixe ilustrado que se converte en real, predición de libros que hai agochados pola Biblioteca, xornal que se rompe e recompón de novo, auga que desaparece dentro dun xornal…
Ao tempo que se entretén búscase un obxectivo: transmitir o valor dos libros e animar á lectura. “Ler lévanos a coñecer os ‘trucos da vida’, a lectura ‘fai desaparecer‘ a ignorancia e ler con constancia reforza o noso cerebro e favorece ‘o mentalismo‘. Resumindo: a lectura, a maxia e o humor fan o mundo mellor”, lémbranos Mago Deimi.
O espectáculo será o xoves 3 de setembro ás 18:00 h. no salón de actos da Casa da Cultura e Biblioteca Pública Municipal Poeta Lois Pereiro e está indicado para público familiar. As entradas daranse por orde de chegada ata completar o aforo permitido.
