InicioCultura17 de maio por un futuro para a lingua

17 de maio por un futuro para a lingua

Representantes da plataforma cidadá Queremos Galego nas Terras de Lemos, Chantada e Quiroga, da que forman parte máis de 500 entidades sociais e culturais, anunciaron en Monforte diante da escultura de Manuel María, a manifestación pola lingua que terá lugar o 17 de maio en Santiago de Compostela ás 12:00 h.

Publicado o

POR
Redacción
- Advertisement -

Xosé Manuel Fernández, voceiro de Queremos Galego en Monforte, lembrou na foto presentación da manifestación de Compostela, que todos os avances para o galego conseguíronse “pola perseverancia e polo esforzo do pobo galego”, como a incorporación do galego ao catálogo de Netflix ou a recente sentenza do TSXG contra Facenda por atacar os dereitos lingüísticos dun cidadán galego.

Fernández advertiu que “a sociedade galega está soa, sen institucións que a amparen na defensa da lingua” e salientou que “é hora de que isto mude e os poderes públicos, comezando polo novo presidente da Xunta, abandonen a súa política de agresión sistemática ao galego e comecen a exercer a súa responsabilidade na defensa dos intereses de Galiza e da súa lingua”.

Para convidar á mobilización do vindeiro 17 de maio tamén participaron algúns mestres do IES A Pinguela e do IES Daviña Rei que fixeron unha foto co cartel, imaxe que se partillou nas redes sociais.

Mestres so IES A Pinguela convidando a participar na manifestación do 17 de maio / XdL
IES Daviña Rei convida a participar na manifestación do 17 de maio. Foto: IES D.R.

Aproveitando esta presentación, o responsable da Mesa Pola Normalización na zona de Lemos, avanzou tamén que neste mes de maio darase a coñecer unha importante campaña a prol da normalización do galego coñecida como “Autocolantes en galego para pediatría”, que consistirá na distribución de adhesivos con fraseoloxía galega para a cativada que é atendida nos ambulatorios das comarcas do sur de Lugo. Deseños todos realizados por ilustradores e debuxantes destas comarcas.

Carteis que anuncian o acto

Plataforma QUEREMOS GALEGO

A plataforma reclama a posibilidade de vivir “en galego agora e sempre” e denuncia que o ensino e unha limitadísima oferta audiovisual en galego botan abaixo os esforzos das familias por garantiren a transmisión da lingua. A sociedade galega propón solucións, como a Iniciativa Xabarín, a Iniciativa polo audiovisual galego ou as bases para a normalización da lingua elaboradas pola maioría da representación sindical do profesorado, das anpas, dos movementos de renovación pedagóxica e pola Mesa, mais dende Queremos Galego recordan que para que estas solucións frutifiquen cómpre que os gobernos galego e español abandonen o desprezo pola lingua galega e garantan a súa presenza e dispoñibilidade “en todo e para todo”.

“Mesmo os pequenos pasos que como pobo conseguimos para o noso idioma están sometidos a revisións constantes”, advirten dende a Plataforma convocante. “Só hai que ver como despois da ampla campaña social e da unanimidade política acadada arredor da iniciativa Xabarín”, lembran. Nesta liña rematan afirmando que “o debate no Congreso pode acabar limitando os avances en horas e cotas de emisión a unha soa das linguas cooficiais” e que “é unha vergoña que non imos permitir que o recoñecemento da pluralidade lingüística no audiovisual, onde Galiza foi quen levou o maior peso na iniciativa social, poida rematar por excluír precisamente o galego”.

Amósanse convencidos de que un novo futuro para o galego é posíbel se cidadanía, entidades sociais e gobernos van na mesma dirección, a de asegurar que o galego está presente e plenamente dispoñíbel. “A lingua galega une e representa o principal elemento de cohesión, identidade e progreso de Galiza. O 17 de maio manifestarémonos en Santiago para que a Xunta de Galiza comece a actuar en consecuencia”, din.

ÚLTIMAS

Afra Blanco: “A Feira do Viño de Quiroga é a primeira festa que descubrín de Galicia”

Afra Blanco, que fora portavoz da sección xuvenil da UGT e hoxe responsable de...

Sinistro de circulación en Chantada

Segundo informou o 112, o persoal do Servizo de Urxencias Sanitarias de Galicia-061 foi...

A Deputación esixe á Xunta o remate urxente da estrada de Folgoso do Courel derrubada hai dous anos

A Deputación de Lugo esixe á Xunta de Galicia medidas urxentes para axilizar e...

O Club Quixós participa estes días na 2ª Copa de España de Eslálom Olímpico

O Club de Piragüismo Quixós, de Monforte, chegou con dez deportistas a terras catalás...