O Presidente da Deputación de Lugo, José Tomé Roca, asistiu este luns á estrea nacional da película Live is Life, do monfortino, Dani de la Torre, un pase que acolleron os cines Kinépolis Ciudad de la Imagen, en Madrid, e no que, xunto ao director, tamén estivo o equipo técnico e artístico do filme.
José Tomé felicitou a Dani de la Torre e a todas as persoas implicadas na produción Live is Life, que tivo a Ribeira Sacra entre os principais escenarios de rodaxe. Ademais, auguroulle moitos éxitos nas grandes pantallas, ás que chegará Live is life a partir deste venres, 3 de xuño.
A institución provincial colaborou, cunha achega de 100.000€, na rodaxe e produción da longametraxe. “Na última década, a Deputación colaborou con máis de 30 producións audiovisuais, o que demostra o noso claro apoio á industria audiovisual lucense e galega”, destaca José Tomé.
Tomé Roca salientou que o filme proxecta a espectacularidade das paisaxes da Ribeira Sacra, “onde se rodou a gran maioría da película, incluíndo localizacións de Monforte de Lemos, O Saviñao, Sober, Pantón ou Quiroga”. O mandatario provincial salienta o orgullo que supón para a provincia de Lugo “amosar a nosa riqueza patrimonial e paisaxística da nosa provincia, que aínda é unha gran descoñecida para moita xente”.
Pleno en Monforte
Pola súa banda o Partido Popular de Monforte lamenta que Tomé “prefira ir á estrea da película en Madrid que presidir o pleno e atender ás traballadoras do Servizo de Axuda a Domicilio. Está máis preocupado polo autobombo que de preocuparse polos veciños”.
“O alcalde debe de presidir todos os plenos sin excepción a no ser que non poida por causas de forza maior, pero faltar por asistir a unha preestrea parécenos unha tomadura de pelo a Monforte”, asegura Katy Varela.
As traballadoras acudiron á sesión, xa que na orde do día íase debater a renovación do seu contrato. O que procedía, segundo apunta Katy Varela, “era escoitar da voz do alcalde os motivos polos que aínda no se reuniu coas interesadas para solucionar este procedemento, sobre todo,” indica, “tendo en conta o seu pasado sindicalista”.
