Catro xogadoras do CV Ribeira Sacra convocadas coa selección galega

O Club de voleibol monfortino terá representación no combinado galego que xogará o Campionato de España de Seleccións Autonómicas.

Saray González, xogadora do CV Ribeira Sacra. Foto: Club V. R.S.

O CV Ribeira Sacra anuncia que catro das súas xogadoras veñen de ser seleccionadas pola Federación Galega de Voleibol para a Selección Galega.

Trátase da infantil Mencía Suárez, e das cadetes Saray González, Sofía e Ángela Bussieres, deportistas que estarán concentradas coa Selección Galega os días 28 de febreiro e 1 de marzo na localidade da Estrada. Este será o paso previo a formar parte dos respectivos equipos que representarán a Galicia no CESA, Campionato de España de Seleccións Autonómicas.

As irmáns Sofía e Ángela Bussieres. Foto: CV Ribeira Sacra.
Mencía. Foto: CV Ribeira Sacra.

Dende o propio club sinalan que as rapazas seleccionadas “teñen xa experiencia neste tipo de concentracións tendo en conta que o pasado ano xa formaron parte da selección galega nas súas respectivas categorías”. Saray e Mencía, por exemplo, xogaron no 2021 co equipo galego infantil no CESA chegando a ser subcampioas de España.

A satisfacción é inmensa no CV Ribeira Sacra por esta convocatoria e “por poder seguir achegando xogadoras ao voleibol de élite”.

DEIXAR UN COMENTARIO

Please enter your comment!
Please enter your name here