Luisa Rainer naceu en Jerez de la Frontera en 1971 pero pasou a súa infancia e adolescencia en Madrid coa súa familia. Chegada a etapa universitaria estudou Arquitectura na Universidad Politécnica.

Grazas a unha bolsa Erasmus desenvolveu o seu proxecto de fin de carreira en Holanda, país que lle deixou pegada e onde viviu durante dous anos. Rainer, unha viaxeira incansable na súa mocidade, descubriu o interior de Galicia a pouco de entrar na súa década vital dos trinta anos e fíxoo da man da meditación. Foi nese momento cando decide asentarse en Pantón, en pleno corazón da Ribeira Sacra, lugar onde cría a dous fillos e desenvolve a súa actividade como arquitecta e empresaria.

Cando lle preguntamos pola elección de Pantón para quedar a vivir e emprender cóntanos que “na nosa primeira visita á Ribeira Sacra quedamos fascinados coa presenza e a forza que aquí ten a Natureza. Quixemos facer unha homenaxe a esta Terra e tentar transmitir aos nosos clientes a primeira emoción que sentimos á nosa chegada”.

Falamos con Rainer da Casa Rural “O Canto da Terra”, un establecemento que rexenta no rural de Follés, en Pantón. Entre varios/as mercaron a casa principal no ano 2005 e despois foron adquirindo outras construcións á par dela en sucesivos anos. Segundo refire tamén, a escritura máis antiga data de 1940 pero seica hai constancia verbal de que hai construcións anteriores a ese ano.

Como foi metervos a montar unha casa rural e como foron os comezos?

Nunca tivemos a intención orixinal de abrir un establecemento de turismo rural, foi o resultado dun proceso de anos nos que o proxecto foi evolucionando. Nun comezo o proxecto estivo enfocado en compartir experiencias con outras persoas: Espirituais, de convivencia, de autoxestión… Chegou un momento no que atopar unha fórmula economicamente sostible foi prioritario e aí foi cando atopamos unha oportunidade dentro do turismo rural. Agora tentamos facilitar aos nosos clientes todas aquelas experiencias que estaban na orixe do proxecto: O sobrecollemento que se experimenta ao contemplar as paisaxes da Ribeira Sacra, o silencio da noite chea de vida, os ritmos das estacións tan marcados como se viven no rural, a calidade do auténtico, da elaboración artesanal con produtos autóctonos, a sabedoría ancestral das aldeas, o coidado do próximo… Todos valores apreciados por calquera ser humano de calquera cultura, sexo e relixión, e que hoxe en día son escasos. E esa é a nosa misión, acoller ao cliente co maior confort, respecto e calidez humana posibles para facilitarlle a experiencia de mergullarse na maxia da Galicia interior. O Canto da Terra é froito do esforzo, colaboración e achegas de innumerables persoas entre as que se atopan familia, veciños, amigos, colaboradores, clientes e traballadores sen os cales non sería o establecemento coa calidade e o recoñecemento que actualmente ten.

“A nosa misión, acoller ao cliente co maior confort, respecto e calidez humana posibles para facilitarlle a experiencia de mergullarse na maxia da Galicia interior”

O proceso de restauración da casa como foi ? Canto tempo vos levou ?

A restauración das edificacións realizouse en 3 etapas ben diferenciadas. Unha primeira etapa na que se restaurou a edificación principal para habilitala como vivenda; outra segunda onde se adaptou o novo uso e á normativa de aplicación en canto turismo rural; e unha terceira onde se ampliaron as instalacións. Todas elas dentro dunha pinza temporal de 7 anos. Para a súa rehabilitación seguíronse criterios de bioconstrucción, arquitectura bioclimática ademais doutros como permacultura, xeobioloxía ou feng-shui. Traballouse localmente, tanto cos equipos humanos como cos materiais.

A día de hoxe como ven ao “Canto da Terra” dentro do innumerable número de establecementos de turismo rural da Ribeira Sacra?

Cada establecemento ten o seu lugar e a súa achega. Ao ser un destino de calidade debe ser o noso obxectivo común e entre todos achegar diferenza, respectar a riqueza da nosa contorna e enfocarnos en preservala e defendela como a nosa identidade. Nese sentido os aloxamentos de turismo rural da Ribeira Sacra estamos conectados e traballando conxuntamente con outros sectores do turismo en grupos de traballo promovidos polo Consorcio de Turismo. Neste momento está a tecerse unha consciencia local colaborativa que creo que arroxará luz nos próximos anos na definición da Ribeira Sacra como destino turístico, especialmente se se aproba a candidatura de Patrimonio da Humanidade.

Ofrecedes diferentes paquetes de aloxamento, un feixe de actividades, pero chamounos a atención o do “Rural Meeting”. Que é? Que clientes tedes?

O Rural Meeting foi un intento de abrir das nosas instalacións a grupos de traballo de calquera sector onde puidesen combinar traballo e lecer na marabillosa contorna na que nos atopamos, gozar das instalacións do balneario de Augas Santas e profundar no seu traballo coa axuda do Coaching con cabalos, servizo que ofrece CrinCoach en Monforte. Desgraciadamente coa actual pandemia foi o primeiro servizo que descartamos xa que non é posible o traballo en grupos.

“O Rural Meeting foi un intento de abrir das nosas instalacións a grupos de traballo de calquera sector onde puidesen combinar traballo e lecer na marabillosa contorna na que nos atopamos…”

Por último, como foi para vós o parón pola Covid-19 e a volta á actividade?

O parón foi e segue sendo brusco, é difícil adaptarse a iso. Aínda que é certo que o turismo rural tivo un bo verán, o outono practicamente rematou na ponte de todos os santos. O Canto da Terra ten a vantaxe de que dispón de distintos tipos de aloxamento na propia casa, co cal aínda que o aluguer por habitacións paralizouse, a demanda de apartamentos subiu. Doutra banda, o noso perfil de clientes tamén é diverso. Aloxamos tanto a turistas como a empresas ou profesionais e está a aparecer un novo perfil de cliente de longa estancia que busca aloxamento mentres atopa unha opción de compra na zona ou mentres rehabilita a súa propiedade. O reto que nos propuxemos neste momento é chegar a profesionais que teletraballan e que desexen facelo durante unha tempada desde unha contorna máis amable e en contacto coa natureza.