Patrimonio material e inmaterial do Camiño e dos concellos da Ribeira Sacra

Esta fin de semana, Pantón presenta o II Anuario da Vía Jacobitana do Camiño de Inverno e organiza unha andaina relacionada co tema. En Chantada darase a coñecer o IV Tomo da revista Alicerces da man da Irmandade Cultural País do Faro.

Aida Menéndez nunha das súas accións dinamizadoras do Camiño de Inverno. Fonte. A.M.

O Concello de Pantón, dentro das actividades das XXXII Xornadas da Rota do Románico, organiza dúas interesantes actividades. O sábado 22 de xuño ás 19:30 h. terá lugar no salón de actos do concello a presentación do II Anuario da Vía Jacobitana do Camiño de Inverno. Trátase dunha publicación con artigos sobre o patrimonio material e inmaterial do Camiño de Inverno ao seu paso polas comarcas do Bierzo, Valdeorras, Ribeira Sacra e Deza.

Intervirán Aida Menéndez, Presidenta da Asociación Camiños a Santiago pola Ribeira Sacra, Manola Porto, xornalista de Onda Cero Monforte, e a historiadora do arte Flora Enríquez.

O domingo 23, e como complemento á conferencia do día anterior haberá un Roteiro polas parroquias dos Castillós. A saída realizarase ás 9:30 h. dende a Praza do Concello de Pantón no Castro de Ferreira, e ao remate haberá xantar opcional no Balneario Oca Augasantas a prezo de 12 euros.

O Camiño de Inverno atravesa Pantón por lugares da parroquia de San Vicente de Castillón: O Reguengo, San Lourenzo, Castrotañe, O Piñeiro, Outeiriño, Remesar e Viris. Lugares onde se mestura a arquitectura popular con outras construción como o Pazo do Reguengo, que data do século XV. Ademais de visitar estes lugares referidos, os camiñantes tamén poderán gozar da visita ás Igrexas de Santiago e de San Vicente.

O nome “dos Castillós” relaciónase cos castella ou castelóns, antigas fortalezas. No límite das parroquias de Santiago e de San Vicente hai un cruceiro do século XVII, considerado como o máis antigo da provincia.

E cambiando de concello, o sábado 22 de xuño terá lugar en Chantada a presentación do Tomo IV de “Alicerces, revista de estudos sobre o Miño medio”. Organiza o acto a Irmandade Cultural País do Faro, entidade que edita a devandita publicación, e o lugar escollido para a ocasión será o Círculo Recreativo Cultural de Chantada a partir das 20:15 horas.

Alicerces contén estudos e artigos de investigación relativos a concellos da Ribeira Sacra bañados polo río Miño: Carballedo, Chantada, Pantón, O Saviñao e Taboada.

Cartel da presentación do Tomo IV da Revista Alicerces

DEIXAR UN COMENTARIO

Please enter your comment!
Please enter your name here