A Xunta de Galicia presentou este martes o ‘Plan Ribeira Sacra. Plan de xestión da paisaxe cultural 2020-2023‘, un proxecto que representa máis de 34 millóns de euros en actuacións de mellora e que se sitúa como “un paso relevante” no camiño cara á inclusión desta zona na lista do Patrimonio Mundial da Unesco.
“O Goberno galego leva moito tempo traballando nesta candidatura“, destacou o presidente da Xunta, Alberto Núñez Feijóo, durante a presentación do documento en Ourense. O plan articúlase en sete programas e contén 35 accións a desenvolver nunha área de aproximadamente 3.000 quilómetros cadrados, na que residen preto de 64.000 habitantes.
A iniciativa incluirá melloras en campos como o patrimonio e a paisaxe cultural; a ordenación do territorio; a conservación dos valores naturais e o medio ambiente; o desenvolvemento económico sustentable; a xestión do turismo; a educación; a formación e investigación ou a comunicación e participación, segundo sinalou Feijóo.
Ademais, define unha estratexia común para a correcta conservación e protección da Ribeira Sacra como unha zona de especial interese por “o seu excepcional Románico e patrimonio antropolóxico”, entre outros.
Neste contexto, Feijóo sinalou que, “en paralelo ao avance desta planificación”, tamén se suma o Plan de acción estratéxico para a Ribeira Sacra no que se inscribe a candidatura técnica da Reserva da Biosfera da Ribeira Sacra e Serras do Oribio e Courel. “Sería un gran fito para Galicia que a Ribeira Sacra obtivese os dous recoñecementos”, insistiu.
PLAN ESPECIAL DE INFRAESTRUTURAS VOS PEARES
Por outra banda, Feijóo tamén participou na firma da Orde de aprobación definitiva do Plan especial de Infraestruturas e dotacións do consorcio local dos Peares.
Trátase dun instrumento “de vangarda” na ordenación do territorio, que abarca dúas provincias e catro concellos, “facendo da complexidade unha oportunidade”, especificou Feijóo.
O plan conta cunha partida de 15 millóns de euros que se investirán en distintas accións como: a urbanización do bordo fluvial do río Búbal, a pavimentación de accesos á estación de tren ou a ampliación do paseo do río Miño, xa en marcha.
