O ser humano é o máis perigoso que existe na face da Terra para calquera ser vivente, tanto do reino animal como do vexetal. É o depredador máis feroz e destrutivo que poboa o Planeta Terra. O ser humano é un feixe irrecuperable de contradicións abocado á auto extinción. Capaz de cometer as maiores atrocidades en nome de ideoloxías que o queren idiota.
A Historia da humanidade está infestada de multitude de feitos máis que vergoñosos que confirman isto. Mesmo nas escrituras sacras dalgunhas relixións organizadas menciónase algo tan simple pero á vez tan importante que pola súa propia simpleza descártase: “a verdade faravos libres”. Xa comprobamos como as relixións organizadas mantiveron idiotizados aos seus seguidores e crentes para que non tentasen chegar a coñecer a verdade.
Convenientemente, os máis espabilados e vividores a conta dos demais, souberon potenciar todo aquilo que, servíndolles a eles, mantiña idiota á humanidade. Xa fai máis de dous mil anos os romanos chamáronlle “pan e circo”, algo que aínda seguen utilizando as clases dominantes para manter á humanidade emboubada e servil a un sistema consumista que os consome.
Aqueles pioneiros do ecoloxismo que na década dos setenta, do século pasado, xa puxeron o berro no ceo denunciando os excesos da humanidade, foron tachados de tolos e conspiranoicos por unha masa de humanos que xa empezaban a ser idiotizados naquela época de cambios convulsos convenientemente integrados polo sistema.
Manter á humanidade ignorante e idiotizada, para o poder foi bastante fácil ao empregar crenzas dogmáticas baseadas no culto á tortura e o pecado. E se algún se saía da norma á fogueira! O ser humano é fráxil e de mente facilmente manipulable. Capaz ata de matar aos seus semellantes seguindo estúpidas ordes no nome de bandeiras ou credos. Ou sexa, maioritariamente imbécil.
Ventos de cambios están a chegar en todo o Planeta, os Pobos sometidos comezan a espertar, mesmo na “avanzada” Europa. Estaremos a comezar a alcanzar a masa crítica necesaria para o cambio que o ser humano necesita?
