O Partido Popular da Zona Sur destaca que, grazas ás últimas axudas do Goberno de Feijóo, os Concellos realizarán obras por valor de preto de 400.000 euros. Dez entidades locais son as perceptoras desta inxección económica, así como a Mancomunidade de municipios.
Folgoso do Courel, Pantón, Quiroga, Ribas de Sil, O Saviñao, Sober, Monforte, Pobra do Brollón, Carballedo e Chantada executarán actuacións relacionadas co subministro de auga, adquisición de vehículos con equipamento para a protección do ambiente e o medio natural, recollida de lixo, limpeza viaria e recuperación de espazos públicos, entre outras.
Os candidatos do PP poñen en valor o que califican de esforzo inversor da Xunta e falan da importancia de que este domingo “os veciños apoien ao Partido Popular, xa que é a única formación que fai rendibles as administracións, xestionando e facendo útiles os fondos públicos”.
