O BNG de Sarria denuncia o peche da billeteira de Renfe

A formación nacionalista vén de rexistrar unha moción en contra desta decisión e insta ao Goberno central a mellorar o servizo ferroviario, reiterando demandas como a electrificación da vía ata A Coruña -e non só ata Lugo como está previsto- e o aumento de frecuencias e horarios para comunicar Sarria con esta cidade.

Concelleiros/as de Sarria na estación. Foto: BNG Sarria

A formación nacionalista denuncia que a decisión de Renfe supón minguar aínda máis a calidade do servizo xa que os usuarios non contan cun espazo físico ao que dirixirse para mercar os seus billetes ou formular calquera queixa ou solicitude de información.

O concelleiro nacionalista Efrén Castro criticou unha decisión que “prexudica a mobilidade da veciñanza en transporte público e tamén o sector turístico” xa que, subliñou, “a vila é unha das principais referencias do inicio do Camiño de Santiago e moitos peregrinos chegan ata aquí en tren”. “Trátase dunha decisión inxustificada xa que a estación incrementou os usuarios nun 40 por cento no periodo entre 2016-2018”, engadiu.

A proposta, rexistrada o xoves 2 de xaneiro no concello, chega para o seu debate no vindeiro pleno municipal; expresa o rexeitamento da veciñanza de Sarria ao peche da billeteira e insta ao goberno central a mellorar o servizo ferroviario dando maior cobertura de frecuencias e horarios para o aumento de viaxeiros e viaxeiras no traxecto Sarria-A Coruña. Ademais, a moción insta á Xunta de Galicia a reclamar e asumir as competencias en materia ferroviaria.

Dende o BNG de Sarria subliñan que “a liña A Coruña-Lugo-Monforte segue sendo una das liñas máis abandonadas de todo o Estado” e responsabilizan da situación tanto aos executivos do Partido Popular como do PSOE en Madrid. Na liña crítica anterior, os nacionalistas lembraron que “hai apenas seis anos o Ministerio de Fomento autorizou a Renfe a suprimir servizos e proceder ao peche de estacións no noso país”.

DEIXAR UN COMENTARIO

Please enter your comment!
Please enter your name here