Os novos vehículos son dúas pick up e un todocamiño que están xa a disposición do persoal municipal para desprazamentos e traballos relacionados coa atención de espazos públicos e bens municipais, e coa prestación de servizos básicos como o alumeado público, o abastecemento de auga ou a recollida de lixo e de residuos.

O alcalde da Pobra do Brollón, Xose Lois Maceda, explicou que “un dos obxectivos principais do noso goberno é a mellora das condicións de vida no rural e para iso é fundamental que o persoal municipal dispoña no día a día dos medios necesarios para atender de forma axil e eficaz o funcionamento dos servizos públicos”. O rexedor recordou que “a colaboración é especialmente importante nun momento no que os concellos estamos infrafinanciados e temos dificultades para afrontar o custo dos servizos”.

O vicepresidente da Deputación de Lugo, Efrén Castro, lembrou “o esforzo orzamentario e de persoal que supón prestar estes servizos para concellos rurais como A Pobra do Brollón, con 22 parroquias e 118 núcleos de poboacion e unha ampla rede de vías municipais e zonas verdes, mais cando se ven na obriga de afrontar competencias impropias que a Xunta descarga nas administracións locais sen dotalas dos recursos necesarios como o Servizo de Axuda no Fogar”.