Continúa a procura do menor desaparecido en Paradela desde comezos da pasada semana. O mozo, de 15 anos, é fillo dunha muller achada morta o pasado venres na casa onde residía co padrasto do menor, que foi localizado tamén sen vida na xornada deste luns.

Segundo fontes próximas á investigación tanto no caso da nai, de nacionalidade holandesa, como do padrasto trátase de mortes por suicidio.

A muller foi achada no seu domicilio, situado na parroquia de Ferreiros, o pasado venres, cando axentes da Garda Civil e persoal dos servizos municipais se personaron na casa para preguntar polo menor, xa que non acudira a clase desde o luns.

A parella da muller, que tampouco estaba no domicilio na xornada do venres, foi localizada máis tarde. Este luns, axentes da Garda Civil regresaron á vivenda encontrando o cadáver do home.

Os primeiros indicios tamén apuntan ao suicidio como causa da morte do padrasto do menor, que permanece en paradoiro descoñecido.