A Xunta asumiu a tutela do adolescente de 15 anos que residía en Paradela coa súa nai e o seu padrasto, que se suicidaron con dous días de diferenza.
Fontes da Consellería de Política Social confirmaron que, ante a situación de desamparo na que se atopa o menor, a Administración autonómica asume a súa tutela de forma “urxente”, xa que carece de familiares en Galicia.
O adolescente foi localizado na tarde do pasado martes nun centro comercial da cidade de Lugo tras permanecer dez días desaparecido. Durante ese tempo, faleceron a súa nai e o seu padrasto, ambos por suicidio, cos que vivía no municipio de Paradela.
Unha vez encontrado pola Garda Civil, foi posto a disposición da Fiscalía de Menores, que analiza xunto aos técnicos da Xunta “a mellor opción” para o adolescente, apuntan estas mesmas fontes.
A nai do menor foi achada morta o pasado venres na casa onde residía co padrasto do menor, localizado tamén sen vida na xornada do luns. Segundo fontes próximas á investigación consultadas por Europa Press, tanto no caso da nai, de nacionalidade holandesa, como do padrasto, trátase de mortes por suicidio.
A muller foi achada no seu domicilio, situado na parroquia de Ferreiros, o pasado venres, cando axentes da Garda Civil e persoal dos servizos municipais se personaron na casa para preguntar polo menor, xa que non acudira a clase desde o luns.
A parella da muller, que tampouco se atopaba no domicilio na xornada do venres, foi localizada máis tarde. Este luns, axentes da Garda Civil regresaron á vivenda e atopáronse co cadáver do home, tamén morto por suicidio.
