307.048,68 euros para dar solución aos problemas da Rúa Cardenal de Monforte

O Alcalde de Monforte, José Tomé Roca, deu a coñecer o pasado 18 de setembro o proxecto de repavimentación da, segundo palabras del, "rúa máis emblemática pola que veciños e visitantes, pasan nalgún momento”.

Presentación do proxecto na rolda de prensa. Fonte: Prensa do Concello de Monforte

O proxecto enmárcase dentro do plan do Equipo de Goberno do Concello de mellorar a cidade, algo que se levou a cabo en máis de 80 rúas da cidade durante o anterior mandato e que continua nos tres meses que levan transcorridos da nova etapa de goberno.

A rúa Cardenal foi feita peonil nos anos 90, durante o mandato do goberno Popular, e dende un primeiro momento houbo queixas sobre a súa pavimentación, incluso do propio goberno municipal, que criticou o traballo levado a cabo pola empresa encargada de levar a cabo as obras. Co paso do tempo, as raíces da zona das árbores foron levantando os adoquíns do seu arredor, o cal ocasionou caídas e lesións, sobre todo de persoas maiores, nos últimos meses.

Neste senso, José Tomé indicou que “o inicio deste novo mandato adquirín o compromiso de arranxar este problema de pavimento na rúa Cardenal e para elo encarguei a principios do mes de agosto un proxecto para analizar todas as deficiencias da rúa e darlles unha axeitada solución”.

O proxecto foi elaborado pola empresa monfortina Abante que, tras analizar con rigor a situación, concluíuse que é necesaria unha reforma integral da rúa do Cardenal. Este proxecto será levado, para súa aprobación, ao Pleno ordinario municipal que se celebrará o vindeiro luns día 30 de setembro. Neste mesmo pleno o proxecto será dotado da financiación necesaria para a súa execución.

O rexedor municipal destacou que “esta obra nin é sinxela nin é barata pois supón, como vimos de explicar, levar a cabo un laborioso e complexo traballo de mellora sobre a rúa do Cardenal. O prezo de licitación da mesma será de 307.048,68 euros”.

Trátase dun investimento relevante que terá que ser levado a cabo por unha empresa que teña capacidade para desenvolver as accións e traballos descritas no proxecto de Abante e que se deron a coñecer publicamente á prensa e aos cidadáns a través da web do concello.

Respecto ao financiamento da obra, dende o concello sinalan que será levado a cabo con remanentes de fondos municipais, que tamén serán levados ó Pleno do día 30. De aprobarse ese día o proxecto da rúa Cardenal e o seu financiamento, será publicado no Boletín Oficial da Provincia, e unha vez resoltas as alegacións (se as houbera) a previsión é publicar a licitación da obra a finais do mes de outubro. En palabras do propio alcalde, “é intención do Equipo de Goberno que dirixo adxudicar a obra antes de que remate o presente ano, que se poidan iniciar as obras arredor de febreiro ou marzo e que estean rematadas antes de maio, causando as menos incomodidades posibles”.

DEIXAR UN COMENTARIO

Please enter your comment!
Please enter your name here